മൂന്നര സെന്റില്‍ ഒരു മൂന്നു ബെഡ്‌റൂം വീട് (വീടും പ്ലാനും)

ഏതു തരം പ്ലോട്ടിലും മനോഹരവും സൗകര്യം നിറഞ്ഞതുമായ വീടൊരുക്കാമെന്ന് നിരവധി പ്രൊജക്ടുകളിലൂടെ തെളിയിച്ച ഫൈസല്‍ മംഗലശ്ശേരി, മൂന്നര സെന്റ് പ്ലോട്ടില്‍ നിര്‍മിച്ച മൂന്നു ബെഡ് റൂം വിടിന്റെ വിശേഷങ്ങളിലേക്ക്.

1650 സ്‌ക്വയര്‍ഫീറ്റില്‍ ഒരു സമകാലീന ഭവനം അതും 24 ലക്ഷം രൂപ മാത്രം മുതല്‍ മുടക്കില്‍.വളരെ ചെറുതും ആകൃതിയില്ലാത്തതുമായ ഒരു സ്ഥലത്താണ് ഈ വീട് നിര്‍മിച്ചിരിക്കുന്നത് സ്ഥലത്തിന്റെ പരിമിതികളെ മറികടക്കാന്‍ വീടിന്റെ രൂപവും സ്ഥലത്തിന്റെ പ്രത്യേക ആകൃതിയും കോര്‍ത്തിണക്കിയാണ് ഈ വീട് ഡിസൈന്‍ ചെയ്തിരിക്കുന്നത്. എന്നാല്‍ സ്ഥല പരിമിതി വീടിനകത്തു കയറിയാല്‍ തീരെ അനുഭവപ്പെടാത്ത വിധത്തിലുള്ള മിനിമലിസ്റ്റിക് ഡിസൈന്‍ ശൈലിയാണ് ഡിസൈനര്‍ അവലംബിച്ചിരിക്കുന്നത്.

2017 ല്‍ പൂര്‍ത്തിയായ ഈ വീട് പാലക്കാട് ജില്ലയിലെ പള്ളത്തേരിയിലുള്ള Mr. അരുണ്‍ പുളികുളത്തിനു വേണ്ടി ഡിസൈന്‍ ചെയ്തു നിര്‍മിച്ചിരിക്കുന്നത് ഗ്രീന്‍ ലൈഫ് എഞ്ചിനീയറിംഗ് സൊല്യൂഷന്‍സ് ആണ്.എല്ലാ അടിസ്ഥാന സൗകര്യങ്ങളും സമന്വയിപ്പിച്ചിട്ടുള്ള ഈ വീടിനെക്കുറിച്ചുള്ള വിശദാംശങ്ങളിലേക്ക് കടക്കാം.

തെക്ക് വശത്തേക്കാണ് ഈ വീടിന്റെ വീടിന്റെ മുന്‍വശം വരുന്നത്, സമകാലീന ശൈലിയുടെ ഗാംഭീര്യം വിളിച്ചോതുന്ന 4 കൂറ്റന്‍ പര്‍ഗോളകളാണ് മുന്‍കാഴ്ചയില്‍ സ്വാഗതമരുളുന്നത്.തേക്കിന്‍ തടിയില്‍ പണിതെടുത്തിരിക്കുന്ന ആധുനിക ശൈലിയിലുള്ള മുന്‍വാതില്‍ തുറന്നാല്‍ ലിവിങ് റൂമിലേക്ക് കടക്കാം, ലിവിങ് റൂമും ഡൈനിങ്ങ് റൂമും വേര്‍തിരിക്കുന്നത് 3 അടി മാത്രം വലിപ്പമുള്ള ഒരു ചെറിയ ചുവരും അതിനു മുകളിലായി സ്ഥാപിച്ചിരിക്കുന്ന അക്വാറിയവും ഉപയോഗിച്ചാണ്. ഡൈനിങ്ങ് റൂമില്‍ നിന്നും അടുക്കളയിലേക്കും കിടപ്പു മുറിയിലേക്കും പ്രവേശിക്കാം, കിടപ്പുമുറിയോടു ചേര്‍ന്ന് തന്നെയാണ് കോമണ്‍ ടോയ്‌ലെറ്റുള്ളത്.ആകൃതി രഹിതമായ ഭാഗത്തിനനുസൃതമായി സ്റ്റെയര്‍കേസ് നല്കിയിരിക്കുന്നതിനാല്‍ വീടിനകത്തു സ്റ്റെയര്‍കേസ് മൂലമുള്ള സ്ഥലനഷ്ടവും ഒരു പരിധി വരെ കുറക്കാന്‍ സാധിച്ചിരിക്കുന്നു.വലിപ്പവും ആകൃതിയും കുറഞ്ഞ പ്ലോട്ടുകളില്‍ വാസ്തുശാസ്ത്രപരമായ നിര്‍മിതികള്‍ എന്നും ഒരു വെല്ലുവിളി തന്നെയാണ് എന്നാല്‍ ഈ വീട് 100 % വാസ്തുശാസ്ത്രത്തില്‍ അധിഷ്ഠിതമായാണ് നിര്‍മിച്ചിരിക്കുന്നത്.

സ്റ്റെയര്‍കേസ് കയറിച്ചെല്ലുന്നത് അപ്പര്‍ ലിവിങ് ഏരിയയിലേക്കാണ്. മുകളിലത്തെ നിലയില്‍ 1 കിടപ്പുമുറി അറ്റാച്ഡ് ആയും അടുത്ത കിടപ്പുമുറിക്ക് സമീപത്തായി ഒരു കോമണ്‍ ടോയ്‌ലറ്റും നല്‍കിയിരിക്കുന്നു.മുന്‍വശത്തുള്ള കാഴ്ചകള്‍ ആസ്വദിക്കുന്നതിനായി കിടപ്പുമുറിയില്‍ നിന്നും ഒരു ബാല്‍ക്കണി നല്‍കിയിരിക്കുന്നു.പാലക്കാടന്‍ വയലേലകളുടെ പച്ചപ്പിലേക്ക് മിഴി തുറക്കുന്ന 130 ച.അടി വരുന്ന പ്രധാന ബാല്‍ക്കണി അപ്പര്‍ ലിവിങ്ങില്‍ നിന്നും പ്രവേശിക്കാവുന്ന രീതിയിലാണ് രൂപകല്‍പന ചെയ്തിരിക്കുന്നത്. തീരെ ചെറിയ പ്ലോട്ട് ആയതിനാല്‍ ഒന്നാം നിലയുടെ മുകളിലേക്കുള്ള പ്രവേശനം അകത്തു നിന്നും നല്‍കിയിരിക്കുന്നു. കോണ്‍ക്രീറ്റ് സ്‌റ്റൈറിന്റെ അധിക ഭാരം ഒഴിവാക്കാന്‍ സ്റ്റെയര്‍കേസ് തെങ്ങിന്‍തടിയില് ആണ് പണിതിരിക്കുന്നത്.

8 ഇഞ്ച് കനമുള്ള സിമെന്റ് ബ്ലോക്ക് ആണ് ഈ വീടിന്റെ നിര്‍മാണത്തിനായി ഉപയോഗിച്ചിരിക്കുന്നത്,മണ്ണിന് ഉറപ്പു കുറവായതിനാല്‍ പില്ലര്‍ ഫൌണ്ടേഷന്‍ ആണ് വീടിനു നല്‍കിയിട്ടുള്ളത്.
ചെലവ് ചുരുക്കലിന്റെ ഭാഗമായി മുന്‍വശത്തു കാണുന്ന വാതിലുകളും,ജനാലകളും മാത്രമാണ് തേക്കിന്‍ തടിയില്‍ പണി കഴിപ്പിച്ചിട്ടുള്ളത്.ബാക്കിയുള്ളവ നന്നായി ഉണങ്ങിയ കരിവാകയിലാണ് തീര്‍ത്തിട്ടുള്ളത്,ഉള്‍വശത്തെ വാതിലുകള്‍ കംപ്രസ്ഡ് വുഡ് വാതിലുകളാണ്.വീട് പണിയുടെ ഓരോ ഘട്ടവും കൃത്യമായ കാലയളവുകളില്‍ പൂര്‍ത്തിയാക്കിയതും,ആദ്യം ചെയ്തിട്ടുള്ള പ്ലാനില്‍ തന്നെ പണി തീര്‍ക്കാനായതും വീടിന്റെ നിര്‍മാണച്ചെലവും നിര്‍മാണ സാമഗ്രികളുടെ വേസ്‌റ്റേജും കുറക്കുന്നതിന് വളരെ സഹായിച്ചു.

Leave a Reply

Your email address will not be published. Required fields are marked *

error: Content is protected !!